Wat eet Varke en hoe om voer koste uit te werk

Net soos meeste mense wat hierdie blog kom besoek is ek ook nuut met die vark boerdery. 

Ek het eers begin met 5 Landras Varke, een klein beertjie en 4 soe. Hulle gewig was in en omtrent 15 - 20kg per vark. Die eerste oplossing wat ek probeer kry het was om hulle verniet te voer en dit het ek reg gekry deur dromme gratis groente en vrugte te kry by Fruit 'n Veg.

My varkies het gegroei, maar teen 'n geweldige stadige pas. Na 'n maand en 'n half het ek besluit om hulle van die groente afval af te neem en het probeer raad kry by die Agrimark en BPK in Caledon. Niemand kon my regtig help nie behalwe om voermeel aan te beveel. Ongelukkig is groeimeel te duur (R270.00 per 50kg sak) en daar sal geen profeite gemaak word met die varkies nie.

Ek het dus met idees rond gespeel en het vir my 'n mengsel gemaak van die volgende.

Wit Mieliemeel 100kg @ R360.00
Geel Mieliemeel 50kg @ R240.00
8 Sakke Semels 25kg x 4 @ R560.00
Groeimeel R50kg @ R270.00
Koring Saksel 100kg @ R70.00

Die totaal was dus 500kg teen 'n koste van R1500.00 wat teen R3.00 p/kg uitwerk.

Die volgende prys vs. voeding struktuur kan dan so bepaal word.

Na die vark gespeen is:

Maand een: 450g voer teen R1.35 per dag en R40.50 per maand
Maand twee: 900g voer teen R2.70 per dag en R81.00 per maand
Maand drie: 1.35kg voer teen R4.05 per dag en R121.00 per maand
Maand vier: 1.8kg voer teen R5.40 per dag en R162.00 per maand
Maand vyf:  2.25kg voer teen R6.75 per dag en R202.00 per maand.

Dit kos jou dus R606.00 om 'n vark op plus minus 50kg te kry.

Die varke  het by die dag gewig aangesit en is baie gesond met die dieet.

As u die voer op 'n goedkoper manier kan kry, laat my gerus weet.

heynsmalcolm@gmail.com



 

Ek wil 'n Vark Boerdery Begin

Antwoord:

Vraag:
Ek bly in die Wes-Kaap en wil graag 'n eksta inkomste verdien, asook iets doen om my besig te hou. Ek het daaraan gedink om met varke te boer, maar weet nie of dit die regte ding is om te doen nie. Ek wil nie te groot gaan nie en het gedink aan so ses varke. Ek het geen agtergrond oor varkboerdery nie en sal dit waardeer as u my kan inlig waar ek meer te wete kan kom daaroor. Dit moet eintlik net sakgeld-inkomste wees. As u dink dit is nie geskik nie, sal ek bly wees as u 'n ander voorstel het.

Antwoord:
 
Vir u omstandighede is 'n klein varkboerdery defnitief 'n goeie uitweg, maar ek stel voor dat u slaghoenders ook oorweeg (aangesien daar 'n groot mark is vir slaghoenders in die informele nedersettings).
Meer oor die varke. Ek neem aan met "ses varke" dat u speenvarkies wil koop en hul self wil grootmaak. 'n Vark word gespeen op vier weke (sowat 15kg) en u sal hul moet voer vir omtrent drie maande tot op 70kg of 100kg.
U boerdery se winsgewendheid gaan afhang van drie faktore, naamlik waar en teen watter prys u speenvarkies in die hande gaan kry, waar u voer gaan bekom, en die belangrikste, watter produkte u gaan lewer. Die kommersiële voer (indien u dit sou gebruik) bevat 16 tot 18% ru-proteïen. Onthou dat die gehalte van u voer die gehalte van u produk gaan bepaal.
Vir 'n klein boer is dit meer winsgewend om die sogenaamde nismark te betree as om die varke aan die slaghuis te verkoop, maar dit gaan van u verg om u produkte self te bemark. Indien u aan die slaghuis wil verkoop, gaan u voorsiening moet maak vir die vervoer van u varke. Verder sal u moet kyk na waar u hulle wil aanhou.
'n Goeie inisiatief is verskuifbare hokke (wat drie varke vat) wat die probleem van modder en die elemente sal teenwerk. Varke is sensitief vir hoë temperature en u sal hul beskerming teen die elemente moet bied. U boerdery sal meer doeltreffend wees as u byvoorbeeld twee sôe het, wat vir u werpsels varkies gee wat u van geboorte af kan grootmaak tot slaggewig.

Hoeveel varke kan ek op een hektaar aanhou

Vraag:

Hoeveel varke kan op 1 hektaar aangehou word?

Antwoord:

Omtrent enige iets is moontlik -- en hoe lank is 'n stukkie tou?! In die Ooste boer hulle met varke, eende en karp in dieselfde gebou. Varke op die boonste verdieping, eende onder hulle en die karp in die water heel onder.

Die normale aanbeveling is 20 hektaar vir 'n 100 sog-eenheid. Dit is nie duidelik watter tipe varkboerdery beoog word nie -- intensief binnenshuis of ekstensief buite of iets tussen-in. Buitenshuis het meer spasie nodig. Die probleem is nie net die aantal sôe wat aangehou word nie, maar ook die groeivarke wat hopelik sal verskyn met suksesvolle teling. 'n Sog behoort tenminste 20 varkies per jaar te kan grootmaak -- tien maal 2,2 werpsels per jaar (in 'n 100 sog-eenheid is daar altyd 1000 plus varke op die plaas). Al hierdie varke produseer mis en uriene plus die skoonmaakwater wat êrens heen moet gaan. Riooldamme moet verkieslik weg van die geboue wees en een hektaar is nie baie groot nie.

Uitreksel: Landbou